李克勤：有无觉得……？(zt)

李克勤：有无觉得……？

　　世界杯踢到依家都踢咗成40场波，唔知各位球迷“睇”成点？

　　有无觉得自己既生理时钟出现问题？最常见既就系无时无刻都想瞓觉，鬼咩，捱咗十几日，日日瞓得果丁多，个人只要稍为静落嚟，周围唔太嘈，就无论乜嘢地方都瞓得着，对眼就劲怕阳光兼容易流眼水，个口就生哂“痱滋”，四肢无力，坐低起身见头晕，如有上述病症，表示你都睇咗唔少埸。

　　有无觉得自己已经睇到唔知边场打边埸，边队打边队，甚至有时对住个电视，会忽然间唔记得墨西哥系绿衫定白衫，又或者波兰系对紧…厄瓜多尔？定科特迪瓦？定哥斯达黎加？我有时喺录影厂都好惊讲错，一个唔小心讲错咗美国下场会对安哥拉咁就大镬。

　　有无觉得食多咗好多薯片、虾条、公仔面、朱古力、汽水等总之对身体完全无益既嘢？有无觉得因为食多咗呢啲嘢而正餐唔多想食？有无觉得好似好耐无见过屋企人、爸爸妈妈？仲有…有无觉得自己突然好烂赌？

　　好彩世界杯系四年先一次！